Kuerz Chronik vum Menn Malkowitsch sengen Deeg an der Loge

Grad sou wéi de Genre vun dësem Buch net ganz eendeiteg ass – Roman, Erzielung oder vläicht Nilo (net identifizéierte literareschen Objet) – genau sou wéineg ass den Auteur vun dësem Buch kloer: Ass et de Menn Malkowitsch selwer, dee sech dach nach getraut huet, seng Notizen aus de Suddelhefter propper op d’Blat ze bréngen, ass et den ominéisen Helminger, deen eng wichteg Roll an dëser Geschicht spillt, oder ass et awer den Nico Helminger, deen eis all als Lëtzebuerger Auteur a Batty-Weber-Präis-Gewënner beschtbekannt ass?
Kuerz Chronik vum Menn Malkowitsch sengen Deeg an der Loge erzielt Episoden aus dem Menn sengem Liewen: wéi en no der Uni bei d’Post komm ass, wéi eng exzessiv sexuell Relatioun hien an eng Publicitéitsagence gefouert huet, wéi säi Bestietnis an d’Bréch geet an hie lues awer sécher de Verstand verléiert. Den Auteur stellt dobäi alles a Fro, spillt mat Zitater, parodéiert bekannt Auteuren, hannerfreet de Sënn an d’Existenz vun de Mënschen, vun der Literatur, der Kultur an allem wat mer mengen ze kennen.